لميس الحديدي تطلق أكبر مسابقة للمشروعات ورواد الأعمال

أعلنت الإعلامية لميس الحديدي عن فتح باب التقديم لأكبر مسابقة تلفزيونية لرواد الأعمال في الوطن العربي، وذلك من خلال برنامجها "كلمة أخيرة" المذاع على قناة "on" مساء اليوم الأحد.

 

وأعربت "الحديدي" عن سعادتها بإطلاق هذه المسابقة، موضحة: "أخيرا وبعد غياب أنا سعيدة إني أعلن اليوم عن فتح باب التقديم لأكبر مسابقة تلفزيونية في الوطن العربي لرواد الأعمال من أصحاب المشروعات والستارتابس".

 

كشفت عن تفاصيل المسابقة التلفزيونية الضخمة، موضحة أنها "ستتيح الفرصة للشباب اللي عندهم مشروعات لسة بتبدأ انهم يعرضوها قدام ملايين المشاهدين ويدخلوا في منافسة قد تكون صعبة وفيها تحدي، وهيقابلوا فيها لجنة تحكيم مش سهلة، لكن هيخرجوا من المنافسة دي -سواء كسبوا أو خسروا - وهم بالتأكيد واخدين دَفعة قوية هاتنقل مشروعهم في حتة تانية، المسابقة هتكون في شكل حلقه أسبوعيه والجوائز ستكون كبيره وسنعلن عنها لاحقا".

 

عن سبب إطلاق المسابقة، قالت "الحديدي": "ببساطه لأننا نعتقد إن الإعلام له مجموعة من الأدوار، بينقلك المعلومة ويقدملك لك تحليلها، ويقدملك التسليه لكنه أيضا يضيء الطريق أمام نماذج يمكنها ان تحقق النجاح ويقدم لها الفرصه، وهذا هو المستقبل، هؤلاء الشباب وهذه الشركات بأفكارها اللي بتحل مشاكل وفيها ابتكارات هي دي مستقبل اقتصاد هذا البلد، الشباب اللي مش معتمدين علي وظيفة ثابتة، لكن غيروا الطريق وقرروا يقتحموا الصعاب ويفكروا بشكل مختلف،. هم دول المستقبل . والحقيقة أن الحكومة المصرية في رسمها لمستقبل اقتصاد هذا البلد تبحث عن هؤلاء الشباب، تبني المستقبل عليهم وتدعمهم بطرق مختلفة، واحنا في هذا البرنامج نريد أن نكون نافذتهم التي يطلون من خلالها علي المجتمع والناس، وعلي المستثمرين أيضا اللي ممكن ينقلوهم لمكان آخر، دورنا إننا نقدم الفرصه لهذا النوع من النجاح الكفاح وان يصبح عدوي بين الشباب".

 

أضافت الإعلامية: "واحدة من أكتر الحاجات اللي بافتخر بيها في مشواري المهني هو إني قدمت أول نسخة من برامج مسابقات لرواد الأعمال، المسابقة دي أتاحت الفرصة لشركات كانت صغيرة يوم ماتقدمت وبعد المسابقة كبروا بسرعة كبيرة، مثلا كان من ضمنهم 4 شباب في بدايات العشرينات عرضوا فكرة شركتهم الصغيرة لأول مرة، الشركة دي أصبحت شركة سويفل اللي وصلت قيمتها بعد سنتين بس ل مليار ونص مليار دولار وطرحت في ناسداك، أيضا هارمونيكا اللي أصبح التطبيق الأكبر للتعارف في منطقة الشرق الأوسط، شركة تذكرة اللي قدرت إنها ترقمن حجوزات الأتوبيسات في مصر كلها، وغيرهم كتير جدا من الشباب اللي قدمناهم فرصة عشان يحققوا نجاحات كبيرة، ونتمني النهاردة إن هذا البرنامج يقدم الفرصة لشباب جدد وشركات جديدة" .

 

وتابعت: "النهاردة بنفتح باب التقديم على مسابقة الفرصة في كلمة أخيرة المسابقة إللي بنطلقها بالشراكة مع جهاز تنمية المشروعات ( مسميدا)، والاستمارة هتلاقيها على صفحة الفرصة في كلمه أخيره على الفيسبوك".

 

أما عن شروط المسابقة فأوضحتها "الحديدي" كالتالي: "الشركة لازم يكون مقرها في مصر وتكون مصرية بنسبة 51% على الأقل - أن تكون شركتك ماعداش على تأسيسها أكثر من 3 سنين - لازم تكون بدأت بالفعل المشروع على الأرض أو على الأقل عندك منتج تجريبي ( بروتوتايب) - أن يكون المشروع بيقدم فكرة جديدة أو حل لمشكلة أو بيخدم الاقتصاد بأي شكل - واحد على الأقل من المؤسسين الممثلين للمسابقة في البرنامج يكون معاه على الأقل مؤهل متوسط".

 

أما عن طريقة التقديم للمسابقة، فقالت: "ببساطة هاتدخل على صفحة الفرصة في كلمة أخيرة على فيسبوك، هتلاقي لينك الاستمارة pin to top، وهكتب اسم مشروعك، والمحافظة اللي فيها مقر المشروع، وبتحدد نشاط المشروع وممكن هنا تختار اكتر من اختيار لو كان مشروعك بيخدم أكتر من مجال، مجالات المسابقة مفتوحة، ثم بيانات الممثل الرئيسي والشركاء المؤسسين، ثم أوصفلنا فكرة مشروعك باختصار وايه القيمة المضافة اللي مشروعك بيحققها، المشكلة اللي بيحلها، الحاجة اللي ماحدش غيره بيقدمها، وإيه السوق اللي بتستهدفه؟ ومين هم عملاءك، ومين منافسينك؟ وإيه بيميزك عنهم؟ وإذا كان عندك عملاء حاليين ولا لسة؟ وهل بتحقق إيرادات؟ وفي الآخر بنطلب منك تحط لينك لفيديو مدته ماتزيدش عن دقيقتين بتحكيلنا فيه حكايتك وحكاية مشروعك.

 

وكشفت أن آخر موعد للتقديم 28 نوفمبر، وأن هناك جوائز مالية ومزايا كثيرة يحصل عليها المتسابقين، مؤكدة أنها ستعلن عن كل تفاصيل المسابقة خلال الأيام المقبلة عبر نافذة برنامجها "كلمة أخيرة".

 

وعقبت قائلة: " في هذا البرنامج فرصه، مش بس انك تسب الجوائز المالية وهي كبيره، لكن أيضا أن تعرض مشروعك، أن تبدأ طريقك، أن تجذب مستثمرين ممكن يتفرجوا عليك، وفرصة إن الملايين تشوفك وتسمع عن فكرتك. وفرصه لينا إحنا كمان إننا نتعرف علي شباب مصري مجتهد مكافح ومبتكر، فرصه للمجتمع انه يعرف إن فيه شباب ناجح في مكان ما وسط محافظات مصر يبحث عن فرصة".