جمال شعبان يوضح كيمياء السعادة في أربعة هرمونات

تعتبر السعادة واحدة من أهم الأشياء التي يسعى الجميع في الحصول عليها ولا يدرون الطريقة الصحيحة في تحقيقها، لذا يستعرض موقع محطة مصر اليوم كيمياء السعادة في اربعة هرمونات وفقاً لما أوضحها الدكتور جمال شعبان عميد معهد القلب سابقاً على الصفحة الشخصية على موقع التواصل الإجتماعي الفيسبوك الخاص به.

 

كيمياء السعادة :

أوضح الدكتور جمال شعبان كيمياء السعادة في أربعة هرمونات هى التي تحدد مستوى السعادة للفرد وهم Endorphins ،Dopamine ، Serotonin ، Oxytocin .

أولاً هرمون ‏Endorphins :

وهو هرمون الرياضة والضحك وأوضح الدكتور جمال قائلاً لما بنروح الچيم أو نعمل رياضة الجسم بيفرز الهرمون ده علشان يتغلب على احساس الألم اللي بتسببه التمرينات، علشان كدة ممكن نحس بمتعة في التمرينات اكتر من الألم

وأكمل كلامه قائلاً أن الضحك كمان طريقة كويسة لإفراز Endorphins، احنا محتاجين نقضي على الأقل ٣٠ دقيقة يوميا نعمل رياضة.. نقرأ أو نتفرج على حاجة مضحكة ومسلية علشان نقدر نحصل على جرعتنا اليومية من الاندروفينس

ثانياً هرمون Dopamine :

وهو هرمون الإنجاز والشوبينج وفسره قائلاً في رحلة الحياة كل واحد فينا بيحرز أهدافا كثيرة سواء كبيرة او صغيرة، شعور الإنجاز ده يزيد من إفراز الدوبامين بنِسَب متفاوتة.

كمان لما بنلاقي تقدير مقابل اَي حاجة عملناها في الشغل او في البيت بيتولد جوانا شعور بالإنجاز والفخر وبالتالي جسمنا بيفرز كميات مناسبة من الدوبامين اللي بيعلي بدوره مستوى شعورنا بالسعادة، ودا بيفسر ليه الناس لما ما ب تلاقيش تقدير مقابل إنجازها بتحس بالبؤس والإحباط

لذلك كلمة مدح بسيطة أو ثناء علي الزوجة بعد مجهودها في إعداد الطعام وترتيب المنزل قد تجعلها في قمة السعادة، بمجرد ما ندخل شغل جديد..، نشتري حاجة جديدة زي بيت او عربية أو أجهزة حديثة، في كل مناسبة من دول الجسم بيفرز دوبامين اكتر وبنحس بسعادة اكبر، وده يخلينا نفهم ليه ستات كتيرة بتخرج من أي مود حزين بمجرد ما تعمل شوبينج..!

ثالثاً هرمون Serotonin :

وهو هرمون العطاء وأوضحه قائلاً ودة بيجي لما نتصرف بشكل فيه نفع للآخرين.. لما نتجاوز الأنا ونكون قادرين على العطاء للآخرين من البشر أو حتي للطبيعة، حتى مجرد بعض المشاركات اللي تبدو بسيطة زي معلومة مفيدة مع الغير.. أو كتابة بوست مفيد على الفيس أو إجابة حد بيسأل على جروب.

كل دي حاجات بتفرز السيروتونين وبالتالي بتزود احساسنا بالسعادة، أيضا تناول قطعة من الشيكولاته أو فنجان من القهوة قد يحفز إفراز السيروتونين وتمنح الشعور بالسعادة.

رابعاً هرمون Oxytocin :

وهو هرمون الحب والحميمية وأوضحه الدكتور جمال قائلاً ودة بيتم إفرازه لما بنقرب من ناس تانيين بمصافحة أو عناق، أحيانا تتصافح العيون قبل الأيادي، لما نحضن حد من أهلنا أو صحابنا، أثناء المصافحة باليد، لما نحاوط حد بدراعنا.

علشان كدة المفروض نحضن طفل صغير مزاجه مش مظبوط، علشان نزود عنده الهرمون ده ويقدر يحس بسعادة من تاني، ببساطة ضروري نعمل رياضة كل يوم علشان الاندورفينس، نحقق إنجازات ولو صغيرة جدا علشان الدوبامين، نكون نافعين لغيرنا علشان نقدر ناخد حصتنا من السيروتونين، ونحضن ولادنا وصحابنا واهلنا علشان ناخد كفايتنا من الاوكسيتوسين.