طوني ماهر يدعم مروان محسن: أرحمو الناس وكفاية تريقة وبوستات

رفض الفنان الشاب طوني ماهر، الحملة الشرسة التي يتعرض لها لاعب كرة القدم مروان محسن، لاعب النادي الأهلي والمنتخب الوطني المصري، ونشر بوست عبر حسابه الخاص على موقع التواصل الاجتماعي فيس بوك علق عليه قائلًا: " بجد الناس في مصر غريبة جداً طول الوقت يقوموا بتقييم الأخرين، ولو مش عاجبهم خد بقي تنمر وتريقة وشتيمة وكوميكس ويطلعوك علي المسرح طول ما انت مش علي مزاجهم لحد مايبان ضعفك أو يبان كسرتك أو تنهار قدامهم، وقتها بس تبدء تصعب عليهم ويدعولك ويدعموك وهشتاج كلنا معاك وفي ضهرك والخ.

وأضاف "ماهر": " أنت عمرك ما هتعرف الشخص اللي قدامك دة بيمر ب اية ولا عندة اية ولا أذيته قد ايه غير لما تبقي مكانه وكلنا عندنا حاجات مش كاملة وناقصة بنحاول نشتغل عليها ونطورها ولولا ستر ربنا مكناش عرفنا نكمل ، أرحمو الناس وكفاية تريقة وبوستات تكسرو بيها اللي قدامكم عشان لو دة حصل معاك مش هتستحمل ، عندك كلمه حلوه قولها معندكش يبقي اسكت، ازاي عايز ربنا يرحمك وانت مش بترحم غيرك".

وتابع: " هذا البوست بخصوص اللي بيحصل مع مروان محسن وغيره كتير وللعلم معنديش اي مشكله في انك تقيّم اداء وشغل اي حد في اي مكان عندي مشكله في انك تتريق عليه وتشتمه وتسخر منه".