بهاء حسني يروي لـ ”محطة مصر” قصة إكتشافه للمخرج الراحل أحمد المهدي: أحدث إنقلابا في الفيديو كليب وكان سابق عصره

برحيل المخرج أحمد المهدي فقد الفيديو كليب أحد أهم أعمدته وواحدا من أكثر المخرجين الذين أثروا هذا الفن بالعشرات من الروائع الخالدة .

يعود الفضل للملحن والموزع والمطرب بهاء حسني في إكتشاف المخرج أحمد المهدي وتقديم فرص الظهور الأولي من خلال العديد من الكليبات التي تعاونا فيها سويا .

يروي بهاء حسني لـ "محطة مصر " قصة إكتشافة للراحل أحمد المهدي ويقول : كنا بين عامي 93 و 94 وطالعين من نجاح أغنية وداع بوداع مع شقيقي المطرب الراحل شهاب حسني وربنا أكرمنا جدا وأنا بطبعي أستعين بفريق عمل محدد وكان معي طاقم تصوير يضم صديقي العزيز مدير التصوير أيمن أبو المكارم و هو عشره عمرنا وكان والده أحد مؤسسي الاذاعه التليفزيون في دبي ومتربيين مع بعض وكان مشارك معي في 90%من الكليبات التي أنتجتها لنفسي ولغيري و كان ذراعي الأيمن في الشغل و كان معانا احمد الخشاب وحش الإنتاج ومحمد عادل المساعد بتاعه و يوسف جو مساعد تالت و طبعا هم النهارده نجوم في عالم الانتاج فما حصل ان نص الجروب انشغل فإبتديت أبحث عن طاقم عمل جديد المهم كنا في رمضان سنه 94 او 95 وشاهدت إعلان أعجبني جدا عن مدرسه خاصه جذبتني حركه الكاميرا و قلت ده مصور مش عادي لازم اشوف مين المصور ده

ويضيف "بهاء ": بحثت عنه ووجدت ان الإعلان نفذته وكالة الإهرام الاهرام وأنا طبعا 90% من شغلي كان في الاهرام اروح أمنتج هناك والحمدلله كان بيعتبرونني الابن المدلل في الوكالة

المهم كلمت أحدالأصدقاء في الوكالة وطلبت منه مشاهدة الإعلان ومعرفة مين اللي صوره قال لي حاضر جري ورجع قالي ده شاب مدير تصوير عندنا اسمه احمد المهدي وهو موظف عندنا في الأهرام قولت له عاوزه ضرورى خليه يعدي عليا في المكتب

وتابع : الله يرحمه جاء وكان مضطربا جدا وقلقان ومخضوض قال لي أنا إسمي احمد المهدي وكنت علمت أن والده هو مدير التصوير الكبير الراحل ضياء الدين المهدي سألته إنت اللي مصور الإعلان الفلاني ؟ قال لي أه وسألته تحب تشتغل في الكليبات ؟ قال لي ياريت قلت له طب حلو أنا هنزلك معايا إن شاء الله عاجبني شغلك وكنت في التوقيت ده عايز أغير من نمط الصورة وكنت أصطدم بأراء الطاقم اللي معايا وكانوا يقعدوا يحبطوني ويقولوا لي كده مينفعش وكده غلط ومش عارف إيه يا غخوانا محدش ليه دعوه وكانت وجهة نظري أن حتي اللي بيغني المفروض يكون وشه منفعل وعرقان وتعبان وكانت القوالب والثوابت بتتعبني وبأحاول كسرها فطلبت احمد المهدي وسألته انت فين يا بني قالي انا موجود في الأهرام ذهبت إليه وقلت له دلوقتي عايز نصور كليب إنت حبيبي و قال لي أنا طلعت كذا إعلان في الساحل تبع الوكاله وكان الساحل في المراحل الأولي لإنشائه وقلت له خليها معاك وشوفت الجو بتاع الساحل انا عايز أحققه

وواصل : كان عندي شويه معارف وجهوا لي الدعوة على لزيارتهم في فيلا بمنطقة فايد وأخذته معايا ومعجتناش فكرة التصوير بالفيلا وإحنا راجعين وجدنا قرية سياحية دخلناووجدناها مناسبة جدا ونظرت لأحمد وقال لي ده زي ما إنت وصفت بالظبط وأنا كنت عايز زاويه واحدة تجمع حمام السباحة والناس والبحر في كادر واحد وقال لي احنا بقالنا يومين بنحضر انا بحكيله أنا عاوز كذا وبحلم بكذا وفعلا وجدنا مانحلم به وحجزنا المكان وإتفقنا وبعد كام يوم وطلعنا فعلا وصورنا وربنا كرم وعملنا ماتيريال حلو جدا وطلعنا على الأهرام وكانت دي أول غنوه وكل ما نعمل 30ثانيه كان المهدي والمونتير وجيه أحمد ينظروا لبعض وقلقانين ويسألوني إحنا ماشيين كويس أقول أه يعني إنت مش زعلان أقول لهم من إيه وقعدنا خلصنا وربنا كرم وقلت لوجيه ياللا يا وجيه عشان نكتب التترات قولت له اكتب اول حاجه إخراج احمد المهدي و قال لي أبوس ايديك أنا موظف انت هتخسرني الشغل قولت له يا وجيه اخلص هتكتب مونتاجك وإخراج احمد المهدي وكانت البدايه بقا اول وتاني وتالت غنوه كانت التانيه علطول أنا مالي وأنا مالي وكان تصويره مثل الأبيض وأسود ودي كانت المرة الأولي التي يصور فيها كليب بالأبيض والأسود ده الابيض و الاسود وهذا كان إعجازا في حينها لدرجة أن قناة الـ mtv عندما أطلقت إرسالها بالعربي قالوا نعمل ساعه في الإسبوع لأحد المطربين العرب ووجدوا أن بهاء حسني هو الأكثر إنتاجا وإنتشارا مع مطربين مثل هشام عباس فكلموني وقالوا لي إحنا عاوزين نعمل ساعه اسبوعيه والساعه ديكانت الشغل بتاعنا و بس بعد 3 أشهر قالوا لي إحنا هنخصص ساعه كل يوم وكان أيضا الكليبات بتاعتنا وبعد 6 اشهر أطلقوا m tv لبنان

وإختتم بهاء حسني تصريحاته لـ "محطة مصر " وذكر أن العروض كانت تنهال علي الراحل أحمد المهدي وكانت النقلة في حياته مع كليب سيدي وصالك لأنغام وفوجئت به يطلبني وقال لي هعدي عليك علشان عاوز رأيك في الكليب قبل ماسلم الماستر ووجدته عندي الساعه خمسة صباحا وأخذني لأشاهد الكليب وقلت له سلم الماستر وإنت مطمئن

وطالب بهاء من الجمهور ومحبي أحمد المهدي الدعاء له بالرحمة بقدرماأسعد الجميع بفنه وعبقريته التي قدمت لنا الكثير من الكليبات الرائعة والخالدة