فخور وسعيد بك.. وزير التعليم يشكر معلم وجه نصائح لطلاب الثانوية العامة

عبر وزير التربية والتعليم والتعليم الفني الدكتور طارق شوقي عن سعادته من خلال صفحته الرسمية بمواقع التواصل الاجتماعي (فيس بوك) بسبب دقة وعمق النصائح التي قدمها معلم يدعى محمد جاد(معلم أول حاسب آلي بمدرسة دشنا الثانوية ومسئول IT وإحصاء ومدير مكتبة يحيي دشنا).

 

حيث قال: أبنائي وطلاب وطالبات الثانوية العامة في كلام كده من القلب عايز أقوله ليكم ومعلش ممكن يكون كتير شوية بس ما هو طالع من القلب وملهوش علاقة بأني اتفق أو لا اتفق مع المنظومة الجديدة للتعليم (نظام التابلت).

 

إن الغرض الأساسي للمنظومة الجديدة هو قياس نواتج التعلم يعني بالبلدي افهم المعلومة صح وإيه أهميتها وازاي اطبقها ومنسهاش مش زي الفترة اللي فاتت اللي يحفظ كويس يجيب مجموع واللي مش عارف يحفظ كويس بينسي حاجات وطبعا المجموع بيقل وفي الأخر ادخل كلية مش عايزها واهو حاجة والسلام ما هو الواحد قرف وتعب والسبب إن كلنا عايزين ندخل علمي علشان ازاي ابقي أدبي فلان دخل علمي هو أحسن مني في إيه ومين قال لمعاليك إن الأدبي وحش كل واحد فينا ليه قدرات و ذكاء يختلف من فرد للثاني ودي أول غلطة بتغلطها شوف أنت نفسك في إيه ومتخليش حد يرسملك طريقك ارسمه بنفسك واجتهد وبإذن الله ها توصل لحلمك بس أنت اعرف نفسك صح وذاتك صح وحط هدفك قدام عنيك

طيب بالنسبة بقي للدوشة والخوف من نظام الامتحان وشكل الأسئلة وهل هو تابلت ولا ورقي وناس عايزة ورقي وناس عايزة تابلت وناس مبقتش فارقة معاها أهو أتعقد وخلاص.

 

أحب أقولك مش مهم ها تمتحن ازاي أوهاتجاوب ازاي الأهم أنت استعديت لشكل الأسئلة الجديدة كويس ودي الحاجة الوحيدة اللي حاليا معروفة ولكن مش عايزين تشوفها أو حتي تقربوا منها -أنت عايز السؤال تكون ليه إجابة محددة مش مهم ازاي أفكر - ولكن خلاص قضي الأمر ياريت بقي تحاولوا تشوفوا نمط الأسئلة دي وتتدربوا عليها لازم تجتهدوا.

 

طيب في نقطة تاني في طلاب كتير فرحت إن الامتحان أو بن بوك طيب يعني انتا عايز إيه من الكتاب لما ها تدخل بيه القليل للأسف فاهم إن معني الكتاب معاك يعني انك عارف كويس كل معلومة ممكن ترجعلها عارف مكانها فين وطبعا أكيد السؤال مش ها يكون مباشر ولكن الواقع اللي شايفه وعايشين فيه إن الطلاب عايزة الكتاب علشان تكتب ملاحظات فيه زي ما الوزير ما قال وهنا أسالك الملاحظات دي ها تكون فعلا معلومات بحثت عنها من المصادر المختلفة وحابب تكتبها أم أسئلة من ملخصات تتوقع أنها تيجي في الامتحان كما يحدث أو إنك ها تصور ملزمة ليلة الامتحان أو أجزاء من الملخصات وتحشرها وسط الورق المصور بتاع الكتاب ده كله تشتيت ليك وها يضيع وقت الامتحان.

 

أرجو منكم أن تفوقوا وتجتهدوا وبإذن الله خير ولكل مجتهد نصيب وكل واحد فينا مقسوم له ها يدخل إيه كل اللي عليك اجتهد وذاكر والكلية والمستقبل بيد الله وحده.

 

طبعا كلامي مش ها يعجب ناس كتير ولكن دي الحقيقة للأسف وكمان السنتين اللي فاتو تم اكتشاف أخطاء في انظمه الامتحانات الالكترونية سواء عند استخدام الشبكات قي المدرسة أو الشريحة أو البيت أو التابلت نفسه لوجود مشاكل في بيت الخط أو بيهنج أو أسباب ترجع للطالب من محاولات لتهكير التابلت مما يوثر علي التابلت والحمد لله تم حل معظمها وظهر ذلك في امتحان مايو أن بعض الطلاب يتعمد الخروج من الامتحان أو الدخول بكلمة سر الامتحانات السابقة بالرغم من التوجيهات دائما لكيفية الحصول علي كلمة السر الخاصة بك لإنها سرية ولا يجوز أن يعرفها احد سوي الطالب و الامتحان القادم في شهر يونيو وسوف يعلن سيادة الوزير عن الجدول اليوم أو غدا الخميس بإذن الله و كل ما يتعلق بنظام الامتحان وكل الملاحظات والتساؤلات التي وصلت لمعاليه وخصوصا أن المشكلات كانت فردية وليست جماعية بالإضافة إلي أنه جاري العمل علي تشغيل الشبكة الخاصة بمدرسة دشنا الثانوية وطبعا المفروض الطالب يتعامل بنفسه مع أي مشكلات سواء توجد جلسة بالفعل أو خطا في اسم المستخدم وكلمة المرور و كيفية الحصول علي كلمة السر والاحتفاظ بها وبفرض إن الامتحان اتحول الي ورقي بردوا مفيش مشكلة لأن التابلت هو وسيلة لأداء الامتحان وهو وسيلة للتعلم من المصادر الرسمية التي تحددها الوزارة يعني ها تمتحن ها تمتحن بالنظام الجديد مفيش رجوع.

 

بأذن الله فترة وها تعدي و يا رب الدفعات اللي بعديكوا يكون حظها أحسن ويتم حل تلك المشاكل والمعوقات ولازم العلاج ياخد وقت.

 

مع تحياتي / محمد جاد - وانتظروا التعليمات بعد مؤتمر الوزير.

 

وجاء رد طارق شوقي على هذا المنشور بعد مشاركته على صفحته كالآتي :إنها حقا نصائح سديدة من معلم مصري أفخر بالعمل معه في منظومة التعليم المصري.