بكاء الفنانة شريفة ماهر على الهواء: ابني ضربني وسرق كل اللي حيلتي | فيديو

حلت الفنانة المعتزلة شريفة ماهر ضيفة مع الاعلامية بسمة وهبة ببرنامج "90 دقيقة" المذاع عبر قناة المحور الفضائية، في أحدث ظهور إعلامي لها بالحجاب بعد غياب طويل عن جمهورها.

وتطرقت الفنانة شريفة ماهر خلال حديثها عن أزمتها مع أبنائها خلال الفترة الأخيرة مشيرة إلى أن أحد أبنائها تعدى عليها بالضرب وسرقة ممتلكاتها بالزور، فضلاً عن قسوة ابنتها "ناهد" عليها حيث أنها تتركها بالشهور من دون السؤال أو الاطمئنان عليها، فقالت: "وزعت جزءا كبيرا من ميراثى، شريف وطارق شتمونى، شريف زقنى مرتين ودراعى اتكسر من 4 سنين، ولادى أخدوا كل اللي حيلتى".

 

وأشارت شريفة ماهر إلى مدى جحود وقسوة ابنتها قائلة: "بنتي مش حنينة، وقلبها جامد علىّ، أجمد من إخواتها، دى ما سألتش علىّ، وشريف طول عمره بيحب الفلوس أكتر من أبوه وأمه، بيعبد القرش"، متابعة: "استغل إني مبقتش أشوف كويس، ومضانى على 4 عقود لأملاكى ما أعرفش فيهم إيه".

 

وأردفت: "مش هشتكيه، ربنا هيجيب لى حقى، أبوه قبل ما يموت قال لى هأمّنك عشان شريف لما أموت هياخد منك كل حاجة، وفعلا طول عمره بيعبد الفلوس، وما كنتش أتخيل إنه يعمل فىّ كده، ده بقاله 9 شهور ما قاليش انتى فين".

واختتمت شكوتها باكية: "ده طردنى من شقتى الإيجار، ودلوقتى قاعدة فى عمارة كاتباها باسم بنتى نيفين، وحد قال لى إن شريف طلب الفيلا من الشهر العقارى رغم إن نيفين مسجلاها، وفعلا استولى عليها وخان الأمانة .. الله لا يكسبك يا بعيد، ورينا الأوراق مش الكلام، أنا مش مضيت لك على حاجة، انت اللى مضيتنى، انت سلطت البواب علىّ، وقلت له ما يجيبليش حاجة ويقول للناس إن عندى زهايمر، حسبي الله ونعم الوكيل فيك، ربنا ينتقم منك".

وفي سياق متصل، علق "شريف" على اتهامات والدته الفنانة شريفة ماهر قائلاً: "عارف إن الجنة تحت أقدام الأمهات، مش ممكن أشتمها، وإيدى تتقطع قبل ما أمدها"، وذلك خلال مداخاة هاتفية له مع الاعلامية بسمة وهبة بالبرنامج.

وأضاف: "اشتريت الشقق اللى عليها المشكلة، وعامل صحة توقيع منذ 2007، والمهندس اللى بنى العمارة معها شهد على هذه العقود"، لترد والدته : "مزورة وهسجنك"، ليقاطعها الابن قائلاً: "بتقول بايعة لبنتها منذ 2011، إزاى هغيّر عقد البيع اللى هى عاملاه؟ اديتها فوق المليون جنيه وفوق الـ100 ألف جنيه سمسرة فى الفيلا اللى باعتها".

وأكد "شريف" أن والدته الفنانة شريفة ماهر حررت محضرا ضده، واتهمته بضربها وسبها وكسر الشقة، دون وجود أى إصابات، مما يتضارب مع روايتها الآن التى تقول فيها إنه تسبب فى كسر ذراعها منذ 4 سنوات، موضحًا أن النيابة حفظت المحضر.

واختتم حديثه قائلاً: "باعت شقتى لحد تانى، وما رضيتش أعمل محضر فيها، ولحد الشهر اللى فات باعت لها لحمة وفراخ وأرز ومكرونة، وببعت لها مؤن تكفيها شهر كامل"، لترد والدته قائلة: "رميت كل اللى انت بعته".