نائب رئيس جامعة الأزهر للطلاب: ”بطلو صياح.. مفيش حاجة اسمها CD”
أكد الدكتور محمد الشربيني، نائب رئيس جامعة الأزهر لشئون التعليم والطلاب، أن جامعة الأزهر لن تستبدل الكتاب الورقي بـ«CD» كما يتوقع الطلاب، مؤكدًا " مفيش CD عندنا فى الأزهر"، وانما سيتم طرح برنامج خاص للكتاب الجامعي بجامعة الأزهر، يقوم الطالب بتحميله من خلال الموقع الخاص بالجامعة ويكون متوفر عليه الكتب الدراسية المقررة عليه فى العام الجامعي.
وأضاف الشربيني، أن ذلك يأتى حرصًا من جامعة الأزهر على مصلحة الطلاب، حيث أن الـ«CD» يحتاج لتوافر جهاز اللابتوب وهو ما يمثل مشقة على الطلاب، مشيرًا أنه لا يمكن طرح الكتاب من خلال منصة رقمية أيضًا بسبب سوء الشبكة فى بعض الأماكن، ما يعني عدم قدرة الطلاب على الوصول الى الكتب المقررة عليهم.
وصرح الشربيني من خلال صفحته الرسمية على فيسبوك، قائلاً: " شباب نسيبنا من الصياح وتعالوا نفهم موضوع ال cd مع بعض كدة وبراحة علشان تعرف ايه الحكاية صح وماتخدش الكلام من اى حد القصة من بدايتها أن استراتيجية مصر 2030 هى أن مصر رقمية واكيد عدا عليكم الكلام ده وسمعتوه بدل المرة الف مرة واكيد كمان عارفين أن فيه حاجة اسمها الحكومة الإلكترونية وان كل الخدمات اللى بتروح تعملها وتقف طابور ممكن تخلصها وتجيلك لحد البيت فيه منكم سمع ده وفيه منكم جربه .. طيب الكلام ده معناه أن مصر كلها بتتحول لدولة رقمية .. وأحنا اكيد جزء من الدولة .. ولو الجامعة ماطبقتش انت نفسك اللى حتقولنا هو احنا ليه متأخرين .. كل الجامعات حتطبق cd وبينى وبينك ريحوا دماغهم وحتى مش سامعين الطلبة بتوعهم بيصيحوا زي انتم مابتصيحوا".
وتابع الشربيني : "طيب هل احنا فى الأزهر حتطبق ال cd ؟ الحقيقة لاء لسببين مهمين انتوا عارفينهم وحقولهم للتذكرة أن ال cd محتاج لابتوب .. طيب حيبقى على موقع الجامعة ؟ حتبقى محتاج تكون باستمرار اونلاين وكتير منكم من مناطق الشبكة فيها ضعيفة أو مش موجودة وبرضة حتبقى بتدفع تكلفة عالية فى الانترنت .. طيب الحقيقة بقة احنا بنعمل ايه !!! شوف ياسيدى .. احنا بنعمل موبايل ابليكاشن حتنزله على المحمول بتاعك اول مرة وانت جهازك على النت زى مابتنزل اى ابليكاشن من جوجل ستور وكدة كتبك حتبقى على تليفونك وتقدر تتصفحها فى اى وقت سواء انت واصلك نت أو مفيش نت طب سعر الحكاية دى غالى ؟ لا ارخص من الكتب لان الجامعة مسعرة الكتاب ال ٢٠٠ ورقة بتقريبا ٢٥ جنيه والسعر حيكون سعر الجامعة الرسمى".
واختتم الشربيني حديثه قائلاً: " بس خللى بالك بقة انك لو اديت صاحبك باسووردك أو بعتله الابليكاشن فنسختك حتتمسح تلقائى وزميلك هو اللى حيدخل من جهازه وسيبكم من حكاية الزغللة دى ياماساكين مانتوا قاعدين تشيتوا ليل نهار على مواقع التواصل الاجتماعى واديك قاعد اهو لسة عمال تقرا .. باتمنالكم التوفيق من قلبى وخلى بالكم أن الدنيا كلها بقت مبنية على التكنولوجيا وحتى لما تطلع سوق العمل حتلاقى نفسك محتاج تتطور مهاراتك التكنولوجية علشان تجارى سوق العمل احنا زمايلكم السنة دى فى الإجازة ايا كان تخصصاتهم بعتنا عدد كبير منهم اتدرب على مهارات سوق العمل زى البرمجة وأمن المعلومات وتصميم المواقع ده غير الانجليزى والالمانى علشان تساعدهم فى سوق العمل وده تم بالتعاون مع وزارة الاتصالات وجهات مختلفة لتعليم الحاجات دى وفيه زمايل لكم اشتغلوا بيها وجابوا منها فلوس".
وطمأن نائب رئيس جامعة الأزهر الطلاب، قائلا: " احنا مش مهمتنا فى الجامعة أننا نديك معرفة بس لكن كمان أننا نساعدك تكون مستعد لبكرة وأنك تكون بتلبى احتياجات سوق العمل علشان تعرف تشتغل وتكون فرد منتج حقيقى فى المجتمع .. ماتقلقوش واتطمنوا .. قريب بإذن الله حيبتدى التطبيق يخرج للنور ومفيش CD عندنا فى الأزهر .. واللى عنيه تزغلل يقوم يتوضى ويصلى ركعتين ... كل امنياتى لكم بالتوفيق.محمد الشربينى نائب رئيس الجامعة لشئون التعليم والطلاب"
