راندا البحيري تكشف كواليس عرض ”مسرح الجريمة”.. رسالة خاصة للنقيب أشرف زكي (فيديو)
وجهت الفنانة راندا البحيري، الشكر للدكتور أشرف زكي، نقيب المهن التمثيلية، عن اهتمامه وتشجيعه لها ولفريق عملها المسرحي الأخير "مسرح الجريمة"، وجاء ذلك خلال حوارها مع موقع محطة مصر نيوز الإخباري أثناء تواجدها في مؤتمر "منتجات الكوزمتكس علاجاً آمناً وفعالاً وصناعة مستقبلية واعدة". بداخل فندق سفير قاعة "كريستالة".
وقالت "راندا" : بالنسبة لمسرح الجريمة فأنا حابة اشكر دكتور اشرف زكي على تبنينا وتبني مشروع محمد علام المخرج المسرحي المحترم اللي بحبه جدا وممتنة ليه جدا وعايزة أقوله انت من اهم مخرجين المسرح في مصر"، متابعة: "علام تعب واشتغل على نفسه جدا لحد ما عمل اللي وصله دلوقتي".
وأضافت: "دكتور اشرف زكي تبنى الموضوع لانه عجبه العمل جداً ولقى انه مشروع تفاعلي وينجح مع الناس، وفعلاً احنا من اول يوم عرض كان المسرح كومبليت الناس قاعدة ع الارض و ع الكراسي مع ان المسرح ضخم جدا بس فعلا الناس جت لينا من اماكن كتير جدا من بني سويف ومحافظات تانية كتير، ف بقينا مش قادرين نقولهم لا مش هينفع تدخلوا"..
وفي سياق متصل، وجهت "البحيري" خالص الشكر للأستاذ وائل عبد الله عضو مجلس نقابة المهن التمثيلية ومدير مسرح النهار حيث قالت: " الراجل ده وقف جمبنا وتبنى المشروع جدا وتعب معانا في المسرح لانه بيقود فكرة المسرح والفرقة".
وأردفت: "أنا بشكر كل واحد في الفرقة ومساعدين الاخراج وكل الناس الي اشتغلت وتعبت معانا .. والبشمهندسة ياسمين جان مصممة الازياء واستاذ عادل حسان مدير مسرح الطليعة"، متابعة: "احنا رحنا سوهاج ونجحنا في الصعيد نجاح كبير والصعيد يعني مسلسل "سلسال الدم" وعارفة الناس بتحبني ازاي هناك واتأكدت من ده لما شفت بعيني ولمسني حبهم جدا حقيقي .. أنا بحب كل سوهاج اوي اوي وميرسي جدا حضنتوني واستقبلتوني بشكل كويس جدا هناك".
كما وجهت الشكر لمعالي نائب مجلس الشعب بسوهاج الأستاذ أحمد الشريف مشيرة إلى أنه تبنى أيضاً الفكرة في سوهاج لإعجابه الشديد بها ما جعله يطلب منا تكرار تجربة العرض هناك مرة أخرى، فقالت: "هو تبنى الفكرة في سوهاج لانها عجبته وعايز يجيبنا تاني في العروض الاخرى في سوهاج ف بنوعده نكون عند حسن ظنه ونعمل حاجات تانية قريب".
وعن عروض مسرح الجريمة كشفت راندا البحيري في تصريح خاص لموقع محطة مصر نيوز أن عرض "الميراث" كان بالفعل العرض الأول من عروض مسرح الجريمة أما عن جريمة "سرقة البروش" قالت: "هو دلوقتي العرض بيتكتب بس لم يحدد بعد هل هو العرض الثاني ولا لا".
