تفاصيل خناقة لقاء الخميسي مع سيدة أهانت غير المحجبات والمطلقات (صور)
أثارت الفنانة لقاء الخميسي ضجة واسعة بهجومها الشديد على سيدة من رواد مواقع التواصل الاجتماعي، بعدما نشرت صورة لبعض السيدات على حسابها الشخصي بموقع "فيسبوك" وأرفقتها بتعليق مُهين يُسيء لهن.
وعلقت السيدة على صورة النساء قائلة: "لو عيل من عيالي فكر يقولي هتجوز واحدة بشعرها أو مطلقة أو مدخنة همسح بيه الأرض كفاية الستات والأمهات اللي بشوفهم يوميًا زي الصورة دي وبتخض على مستقبل بناتهم اللي أكيد هيقلدوهم معرفش ليه بتكرهوا الحجاب كدة ".
وسرعان ما خرجت "الخميسي" عن صمتها لترد على السيدة برسالة شديدة اللهجة حيث قالت: " يا أستاذة هالة يومك جميل إن شاء الله، للأسف الشديد أنا سمحت لنفسي أخد البوست بتاع حضرتك من غير استئذان ودة مش صح بس علشان أقول لحضرتك كلمتين ياريت تقريهم كويس".
وتابعت: "مش من حق حضرتك تاخدي صور ناس وتحطيها عند حضرتك وتذميهم وتدخلي في اختياراتهم لحياتهم، مش من حقك اصلا تختاري حياة ولادك لانهم ليهم كل الحق في الاختيار، مش من حقك تحكمي على أخلاق الناس وحياتهم لأنك مش واصي ولا ولي".
واختتمت رسالتها قائلة: "فياريت حضرتك تخليكي في نفسك وتطوري من نفسك وتغضي البصر لو مش عاجبك الصور ودعي الخلق للخالق، كل حي ادرى بحياته واختياراته وعليكي احترامه والتزام الصمت، شكرًا ويوم سعيد"، وذلك من خلال خاصية القصص المصورة "ستوري" عبر حسابها الشخصي بموقع تبادل الصور والفيديوهات "انستجرام".
جدير بالذكر أن آخر أعمال لقاء الخميسي الفنية كانت مسلسل "ضد الكسر" الذي خاضت به السباق الدرامي لشهر رمضان الماضي 2021، مع النجوم نيللي كريم ومحمد فراج.
