وزير الري: في حالة الملء الثاني لسد النهضة سيكون هذا تعاملنا

أكد الدكتور محمد عبدالعاطي، وزير الموارد المائية والري، إن مصر تحاول امتصاص أكبر قدر من الصدمة الخاصة بالمياه حال الملء الثاني للسد الإثيوبي، حتى لا يحدث تأثير صعب على المصريين: «الدولة مش ساكتة وشغالين من 5 سنوات بجدية في كل شيء، من أول عمل سدود لجمع مياه الأمطار أو بناء محطات معالجة، أو ترشيد مياه أو تبطين ترع أو ري حديث أو ري ذكي أو أعمال حماية من السيول أو استكشاف مياه جوفية وإدارتها».

وأضاف «عبدالعاطي»، خلال حواره في برنامج «الحكاية»، الذي يُعرض على شاشة «إم بي سي مصر»، مع الإعلامي عمرو أديب، أن مصر عملت على تقنين الزراعات سواء الأرز أو القصب أو الموز وتقليل المساحات وكان هناك استجابة كبيرة من المواطنين، ويجري العمل على قياس قدرة مرونة السيستم على تحمل الصدمات «بنشوف قدرتنا قد إيه في تحمل الصدمات من ملء السد، ده مؤشر أساسي، فيه جزء سياسي وفيه جزء فني كل واحد شغال في الملف بتاعه».

وأوضح وزير الموارد المائية والري، أننا سنعمل على امتصاص الصدمة في اليوم التالي لبدء الملء الثاني للسد الإثيوبي، حيث إن الملء الثاني يعد في حد ذاته صدمة «عندنا جاهزية للتعامل مع هذه الصدمة، فيه كذا سيناريو، لو هيملى وفيه جفاف هتبقى صدمة كبيرة شوية، لو هيملى وفيه فيضان متوسط مفيش مشكلة، ولو هيملى وفيه فيضان عالي برضوا مفيش مشكلة، المشكلة لو قام بالملء وفيه جفاف قارس أو متطرف ده المشكلة، وبنشوف ممكن قدرتي تخليني أتعامل ازاي مع الأمر ده».

وأردف أن مصر قامت ببناء قدرة عالية جدا بحيث نتعامل مع هذا الأمر: «احتمال يبقى السنة دي فيها جفاف، وارد جدا مش شرط ييجي فيضان زي السنة اللي فاتت، فيه مؤشرات نتابعها كل شهر بتقول المطر رايح فين، نتمنى أن يكون فيضان السنة دي زي السنة اللي فاتت يبقى مش هيحصل مشكلة».