المذيعة أسما رؤوف : فكرة نقل المومياوات جاءت للوزير من فيلم شاهده وهو صغير
كشفت مذيعة السياحة أسما رؤوف عن أسرار إحتفالية نقل المومياوات الملكية ونشرت أسما علي حسابها الشخصي بموقع تبادل الصور والفيدوهات إنستجرام صورة للموكب الملكي وعلقت عليها قائلة :الفكرة العظيمة لموكب المومياوات المهيب ده فكرة دكتور خالد العناني و عرضها على سيادة الرئيس و هو وزيرا للآثار فقط قبل مايكون وزيرا للسياحة و الآثار حاليا
وأضافت : دكتور خالد كان عنده حلم انه يبهر العالم كله و يوريهم هيبة مصر بحضارتها و تاريخها و ملوكها العُظام ملوك الحضارات
وتابعت : الفكرة جاءت لسيادة الوزير من فيلم كان شافه و هو صغير عن استقبال مومياء الملك رمسيس التاني لما وصلت باريس سنة ١٩٧٦الفيلم ده كان رسالة بيقولوا فيها شوفوا ازاي بنحترم اجدادكم
لما استقبلوا المومياء حطوا سجادة حمرا في الطيارة و اطلقوا اعيرة ناريه احتفالا بيها و استقبلوا المومياء استقبال رئيس جمهوريه
وواصلت : جت الفكرة لدكتور خالد من هنا و قرر أن يتم نقل المومياوات في موكب مهيب يليق بأصحاب الفضل على مصر و البشرية كلها ، فهما من صنعوا التاريخ و أحفادهم بيكملوا مسيرتهم
العالم كله شاف مصر وجمالها النهاردة شافوا جمال القاهرة شافوا احترام المصريين لتاريخهم ولأجدادهم
ووجهت أسما الشكر للرئيس وقالت : شكرا لسيادة الرئيس اللي امر بتطوير التحرير و عين الصيرة واكتمال الصورة الحضارية للموكب
شكرا للدكتور خالد العناني اللي فكر و نفذ و روج للسياحة المصرية في كل العالم وخلانا كلنا في احساس فخر ووطنيه عظيمه
وأضافت :والله بعد ما خلص الموكب قعدت اقول هو خلص ؟؟ مكنتش عايزاه يخلص بجد
جمال و عظمه و فخر و هيبة و حضارة و تاريخ لا ينسى انها مصر
